САН ХӨМРӨГ

/САН ХӨМРӨГ
САН ХӨМРӨГ 2018-05-30T12:22:58+00:00

МУЭ-ийн Фондын материал нь XX зууны Монголын дүрслэх урлагийн хөгжлийн түүхийг харуулахаас гадна тухайн үеийн нийгэм улс төрийн сэтгэлгээ эх орны амьдралыг уран сайхны хэллэгээр бодитой дүрслэн илэрхийлсэн түүхийн үнэт бүтээлүүд юм.
1963 оноос 1991 он хүртэлх уран зураг, зураасан зураг, судалбар зураг, монгол зураг, зурагт хуудас, уран баримал, керамик, сийлбэр, хөөмөл чимэглэлийн 410 уран бүтээлчийн 2500 гаруй бүтээлийг ном болгон бэлтгэлээ.

Номын бэлтгэл ажлын хүрээнд бүх бүтээлийг Швейцарын хөгжлийн агентлагийн тусламжтайгаар шинэчлэн бүртгэлжүүлж, онлайн галерей архивтай болох үүднээс шаардлагатай бүтээлийн рам жаазыг солих, цэвэрлэх, хүрээ хийх, бүх бүтээлийн гэрэл зургийг чанарын өндөр түвшинд авч дижитал хэлбэрт хувиргах зэрэг ажлуудыг хийж гүйцэтгэв. Их гэмтэлтэй 119 бүтээлийг Соёлын Өвийн Төвөөр сэргээн засварлуулаа.

Нэгэн цаг үеийн дүрслэх урлагийн түүхэн бүтээлийг сэргээх Монголын Дүрслэх урлагийн өв соёлыг хамгаалах, ирээдүй хойчид бүрэн бүтнээр нь өвлүүлэн үлдээж, сургалт, судалгааны зорилгоор ашиглах, боломжыг бүрдүүлнэ.
Бидний хамтран хийсэн ажил нь Монголын түүх соёл судлалд биет материал болж урлаг судлал, судалгааны эргэлтэнд орох бүрэн боломжтой. Уг ном нь архив хэлбэрээр хадгалагдаж байгаа урлагийн бүтээлүүдийн хөдөлгөөнд оруулан амьдруулж байгаагаараа их ач холбогдолтой юм.